Arun Jaitley "Pawisa note tih thih sut a ni dawn lo"

Eptuten sorkar laipuiin pawisa note a tih thih avanga mipui nawlpuiten harsatna an tawh hrang hrangte sawiin, thupek hi sut leh turin sorkar an nawr. Mahse Union Finance Minister Arun Jaitley-a chuan sorkarin ruahmanna fel tak hnuaiah he thupek hi a siam a, a sut dawn lo tih a sawi.

Arun Jaitley-a chuan ruahmanna ṭha tak leh, a kalpui dan tur pawh fel fai taka siam a ni tih a sawi a, ramchhunga bank official leh hnathawktute chuan hna ṭha tak an thawh avangin a fak thu a sawi bawk. Jaitley chuan bank hnathawkte chuan ni sarih kalta chhung khan cheng vaibelchhe tel an buaipui a, holiday-ah pawh chawl loa rim taka an thawh avang≠in a fak tih a sawi. Technician-te pawhin pawisa note thar lakchhuah theihna turin ATM te an siamṭha nghal zel a ni, a ti.

Pawisa note thi thlengna turin sum a tam tawk tih a sawi a, hemi atan hian Reserve Bank leh sorkar laipui chu an lo inbuatsaih lawk vek tih a sawi. Mipuite chu chiai lo tura ngenin, engmah an chan dawn lo tih a sawi.

Sorkar laipui pawhin eptuten sorkar a inbuatsaih ṭha tawk lo nia puhna chu a dik lo tih a sawi a, he thil hi sawilawk loa puan a nih chhan chu sum chheprelh leh chhiah awlru ṭhinte beih letna tura tih a nih vang a ni, a ti.