Ramchhung Lawrkhawm

CJI-in buaina nasa zawk a chhuah hlauhthawng

Chief Justice of India TS Thakur chuan pawisa note tih thih a nih avanga mipuite harsatna tawh mek chu chinfel thuai a nih loh chuan buaian nasa zawk a chhuah mai a hlauhthawn thu a sawi.

Supreme Court chuan sorkar laipuiin High Court leh lower court hrang hranga pawisa note tih thih a nih avanga thubuai thehluh, stay tur a ngenna chu a hnawl a, mi tam takin an harsatna an tawh mek chu an hawisan thei lo tih a sawi.

Chief Justice of India TS Thakur chuan court hrang hranga petition thehluh a nih chhan chu mipuiten harsatna an tawh vang a ni tiin, hun rei tak tak pawisa thleng tura intlar te a ngaih avangin mipuite an mangang tawh a ni, a ti. Mipuiten harsatna tawh dante chu sorkar lam pawhin a pha thei lo ang tih a sawi bawk.

Kerala HC compound-ah punkhawm khap

Kerala-a Ernakulam district collector chuan advocate leh journalist-te inkara buaina chhuak vangin, Thiruvananthapuram-a Kerala High Court compound chhungah thla hnih chhung atan punkhawm a khap.

Court compound chhunga punkhawm leh nawrh huaihawt khapna hi November 17 tihchhuah a ni a, thupek tihchhuah a nih aṭanga thla hnih chhung atan khapna thupek hi hman a ni ang. Kumin July thla khan court compound-ah hmeichhe pakhat chunga sorkar ukil pakhat mawi lo taka chea puhna chungchanga journalist-te news report danah advocate leh journalist-te hi an intibuai a ni.

Petrol pump atangin Rs 2,000 lak theih

Sorkar laipui chuan pawisa note tih thih anih avanga mipuite harsatna tawh mek tihziaawmna kawng khat atan nimin aṭang khan ramchhunga petrol pump thlan bikah debit card hmangin Rs 2,000 chin lakchhuah theih a nih thu a sawi.

Pawisa lakchhuah theihna tur hian petrol pump 2,500 thlan a ni.

Official chuan ni khatah debit card hmangin petrol pump-ah pawisa fai, Rs 2,000 lakchhuah theih a ni dawn tih a sawi a, petrol pump-ah pawh SBI POS machine awmna te chu thlan an ni tih a sawi.