Maha Minister motor aṭangin Rs nuai 91 man

Maharashtra-a Cooperative Minister, BJP hruaitu Subhash Deshmukh-a motor aṭangin pawisa fai, cheng nuai 91 man a ni a, eptu party Congress leh NCP chuan minister hi bang turin an phut nghal.

Eptute chuan state-a rorellai, BJP hruiatuten bank-a pawisa an thawn kual dan chu Income Tax department chhui chian tir an phut bawk.

NCP thupuangtu Nawab Malik-a chuan, ìBJP hruaitu kut aṭanga sum tam tham tak man a nih hian sum chheprelhtute chu tute nge tih a hriat theih a ni. Sorkar laipuiin black money leh eiruk dona beihpui a thlak tirh aṭang a, sum chheprelhte haichhuah a nih theih nan hian BJP hruaitute thil neih leh in leh lo-te chu dapsak an ni tur a niî, a ti.

Report-in a tarlan danin pawisa fai, cheng nuai 91 chuang man hi Minister ta, Lokmangal Group pawisa nia sawi a ni a, hei hi Osmanabad municipality squad-teín an man a ni. Heng pawisa-te hi Rs 1,000 note vek a ni.

State unit Congress thupuangtu, Sachin Sawant chuan an state-a BJP hruaitute bank account chu enfiah a, thla ruk kalta chhunga sum an tih chet dan chu chhui chiang tura an phut thu a sawi. BJP hruaitute hian pawisa note tih thih tur hi an hrelawk niin a sawi bawk.

Pawisa note tih thih a nih hnu hian Maharashtra-a BJP MLA pakhat unaupa kut aṭangin pawisa fai, cheng vaibelchhe ruk chuang man a ni tawh bawk a ni.

Ningani khan Nashik-ah car pahnih aṭangin Rs 500 leh Rs 1,000 note, cheng nuai 73 dawn police-teín an lo man tawh bawk. Police-te chuan Kopargoan pana tlan car pakhat aṭangin Rs 32,99,500 an man a, Aurangabad district-ah Vaijapur pana tlan car pakhat aṭangin cheng nuai 40 an man bawk tih an sawi. Pawisa phurtu car-te hi hrensak nghal an ni.