Indore-Patna rel chesualah mi 103 an thi

Uttar Pradesh-a Kanpur bulah nimin zing khan Indore-Patna Express rel a chesual a, mi 103 an thi a, mi dang 200 dawnin hliam an tuar.

Rel hi Pathianni zing dar 3 vel khan Kanpur aṭanga km 100 vela hla, Pukhraya-ah a chesual a, rel-ah hian khualzin 500 chuang an chuang. Rel chetsual lai hian khualzin tam zawk chu an muhil a ni.

Rel chetsual chhan hi hriatchian a la ni lo a, mahse railway official-te chuan kawng chhiat vang a ni mai thei niin an sawi. Chetsualna hmunah hian mi 250-teín chhanchhuah hna an thawk a, anmahni pui tur hian sipai leh doctor-te tirh nghal an ni bawk.

Rel pindan 14 zet chu an let a, heng zinga pindan pali - S1, S2, S3 leh S4 chu a chhe nasa hle.

Railways Ministry thupuangtu Anil Saxena chuan, hliam tuarte hi damdawi-inah hruai nghal an nih thu leh, an zingah hliam na tak tak an awm avangin thi zat pawh hi an la punchhoh theih thu a sawi.

Prime Minister Narendra Modi chuan chetsualna thleng chu pawi a tih thu sawiin, thi chhungte leh hliam tuarte a tawrhpui thu a sawi. Home Minister Rajnath Singh chuan chetsualna thlen hnu hian Railway Minister Suresh Prabhu a be nghal a, chetsualna thlenga thi chhung≠te a tawrhpui thu a sawi. He chetsualna thlenga mawhphurtute chungah na taka action lak a nih tur thu a sawi bawk.

Congress President Sonia Gandhi chuan vanduaina tawkte a tawrhpui thu sawiin, railway thuneitute chuan rel chetsualna chhan chu uluk taka an chhui chian a beisei thu a sawi. Congress unit-te chu vanduaina tawkte chhanchhuah leh chhawmdawl kawngah thuneitute thawhpui turin a ngen bawk.

Railway Minister Suresh Prabhu chuan Indore-Patna Express chesuala thi chhungte chu cheng nuai 2 ṭheuh pek an nih tur thu leh, hliam tuar na zualte chu Rs 50,000 ṭheuh pek an ni dawn tih a puang nghal.

Uttar Pradesh Chief Minister Akhi≠lesh Yadav-a chuan rel chesuala thi chhungte chu cheng nuai nga ṭheuh pek an nih tur thu leh, hliam tuar na zualte Rs 50,000 bakah hliam na vak lo te Rs 20,000 ṭheuh state sorkarin a pek tur thu a sawi ve bawk. Madhya Pradesh sorkar pawhin thi chhungte cheng nuai hnih leh hliam tuar na zualte Rs 50,000 ṭheuh a pe dawn tih a sawi.