Ramchhung Lawrkhawm

Mumbai-ah pawisa fai Rs vbch khat chhar

Navi Mumbai crime branch chuan kar kalta khan Mumbai-a real estate agent pahnih kut aṭangin pawisa note hlui, cheng vaibelchhe khat an man.

Police-te chuan midang pahnih, real estate agent-te hnena an pawisa note hlui a thara thleng sak a, commission 30% pe tura phuttute an man tel bawk.

Senior inspector Ashok Rajput chuan mi ṭhenkhatin Sector 28, Vashi-ah pawisa note hlui tam tham tak hi thleng an tum tih an hrilh niin a sawi a, enfiah tura kal nghalin Skoda car-a chuangte leh an pawisa kawl chu an man ta niin a sawi. An pawsa man hi Rs 1,000 note vek a nih thu sawiin, Criminal Procudre (CrPC) hnuaiah mi pali te chu thubuai siamsak an ni a, income tax department pawh hriattir nghal an nih thu a sawi.

Jaya-i damdawi-in atangin chhuak thuai dawn

Tamil Nadu Chief Minister J Jayalalithaa-i chu hun rei tak damdawi-inah enkawl a nih hnuin ṭhat lam a pan zel a, in lamah a haw thei thua dawn nia sawi a ni.

Jaya-i hi khawsik sang leh dehydration avangin September 22 khan Chennai-a Apollo Hospital-ah dah a ni a, ICU-ah hun rei tak dah a nih hnuin Inrinni khan ward pangngai-ah sawn a ni tawh. AIADMK thupuangtu CR Saraswathi chuan Jaya-iín ṭhatlam a pan zel chu lawmawm a tih thu sawiin, a tan an ṭawngṭai sak reng tih a sawi a, in lamah hruai haw theih a ni thuai dawn a ni, a ti.

Sum dahlut hnemte hnenah IT in hriattirna pe

Sorkar laipuiin Rs 500 leh Rs 1,000 note a tih thih hnuah pawisa thite hi bank-ah dah luh reng an ni a, hetihlai hian a hlawma sum tam tham tak dahlut, mimal leh firm eng emaw zat hnenah Income Tax department chuan hriattir a pe tawh.

Official-te chuan bank hrang hrangin report an thehluh aṭangin, an account-a a hlawma sum tam tham tak dahlutte chu an sum lakluhna sawifiah turin Income Tax Act (power to call for information) section 133(6) hnuaiha hriattirna pek an nih thu an sawi. IT deparment-in hriattirna a pekte hi kum hnih kalta chhunga Income Tax Return copy thehlut tel tura tih an ni.