Rel chesuala thi mi 142 an tling tawh

Uttar Pradesh-a Kanpur khaw bula Indore-Patna Express chesuala thi chu mi 142 an tling tawh. Thi zinga mi 100 te chu tunge an nih hriat an ni tawh bawk.

Pathianni zing dar 3 vel khan rel hi chesualin pindan 14 a let a, heng zinga pindan pali-te chu a chhe hneh hle. Rel chesuala thi zinga a tam zawk hi pindan pahnih, S1 leh S2-a chuangte an ni.

Ruang 97 post-mortem an ni tawh a, an ruang hi an chhungte hnenah hlan a ni tawh bawk. Thi zinga a tam zawk hi Uttar Pradesh, Madhya Pradesh leh Bihar state ami an ni.

Rel-a chuang ṭhenkhat chuan rel hi a chetsual hma pawhin a chhan hriat lohin a ding fo a, a hnuah chak taka tlanin a let zui ta niin an sawi.

Chetsualna hmunah hian chhan≠chhuah hna thawk turin National Disaster Response Force (NDRF) team panga tirh an ni a, railway-a thawk leh sipaiten an pui bawk. Pathianni-a rel chesual hi kum 2010, May thlaa West Bengal-a Gyanehswari Express chetsualna thlenga mi 170 an thih hnua rel chetsualna rapthlak ber a ni.

Railway Minister Suresh Prabhu chuan rel chetsual chhan dik tak chu chhui chian mek a ni tih a sawi a, hliam tuarte chu a theih anga ṭanpuina pek an ni tih a sawi bawk. Pathianni tlai khan damdawi-ina hliam tuar enkawlte chu a tlawh nghal a ni. Official-te hnenah chetsualna thlenna hmuna chhanchhuah leh chhawmdawl hna thawh chu chak taka kalpui turin a hrilh bawk.

President Pranab Mukherjee, vice president Hamid Ansari, Prime Minister Narendra Modi leh hruaitu dangte chuan chetsualna thlenga thi chhungte an tawrhpui thu hi an sawi tawh bawk.