Ramchhung Lawrkhawm

Zakir Naik-a website block sak

Sorkar laipui chuan Islamic preacher Zakir Naik-a NGO Islamic Research Foundation (IRF) chu dan pawna a hnawlsak hnuah, a website-te a block sak leh.

National Investigatoin Agency (NIA) chuan Naik-a NGO hminga awm hmun hrang hrang 10 a dapsak hnuah, sorkar chuan a website-ah hian midang fuipawrh zawnga thu sawi leh video-te dah a ni tih sawiin a block sak a ni. NIA chuan Facebook page te tihtawp sak turin server awmna, US pawh sawipui a tum bawk. IRF-a thawk, director leh Zaik-a nupui te pawh ram pawn lam aṭanga sum an hmuh dan chungchangah thu zawhfiah tum an ni. NIA chuan Zaik leh a thawhpui midangte lakah kar kalta khan thubuai a lo ziaklut tawh a ni.

Ramria inkahna thlengah sipai pakhat thi

Jammu and Kashmir-a Rajouri district-ah Pathianni zan khan Pakistan sipaiten Indian post-te kap lehin, Border Security Force (BSF) sipai pakhat a thih bakah, mi dang pathumin hliam an tuar.

Kar kalta Inrinni aṭang khan Pakistan sipaite hian ramria inkahhai thuthlung siam chu ṭum thum an bawhchhe leh tawh a ni. Inrinni zing khan Pakistan sipaite hian Nowshera section-ah silai an hmetpuak a, tlai lamah Sunderbani sector-a Indian post leh civil area an kap leh bawk. Northern Command chuan Pakistan sipaite hi chhan let nghal an nih thu a sawi.

Parliament in hnih inkhawm titawp

Parliament in hnih, Rajya Sabha leh Lok Sabha-a nimina rorel inkhawm chu, sorkar laipuiin pawisa note a tih thih chungchangah eptu leh rorellai member-te an inhnial beng≠chhen avangin rorel thei lohin ṭum eng emaw zat tihtawp a ni.

Nimin kha Parliament thlasik ṭhutkhawm ni lina a ni tawh a, mahse nimin thleng khan pawisa note tih thih chungchangah member-te an inhnialbuai ṭhin avangin rorel mumal loin an la awm a ni. Eptuten chuan Prime Minister Narendra Modi chu pawisa note tih thih a nih chungchang hi sawifiah turin phut mah se, PM hian hemi chungchang hi engmah a la sawichhuak lo.