PM-in surgical strike tih ṭawngkam hman a duh lo

Prime Minister Narendra Modi chuan BJP MP-te hnenah, pawisa note tih thih chungchang sawina atana surgical strike tih ṭawngkam hmang tawh lo turin a ti.

BJP Parlamentary Party meeting-ah PM Modi chuan, ìHei hi pawisa lem leh firfiakte laka beihpui thlakna a ni, surgical strike tiin sawi suh u. Surgical strike chu sipaite chauhin an ti thei a, keini lo tih ve theih a ni lo. Eptute chuan an sawi an ni pawhin nangni chuan sawi ve suh uî tiin an party MP-te a hrilh.

Congress Party kaihhruaiin, eptu party-te chuan sorkar laipuiin Rs 500 leh Rs 1,000 note a tih thih chu ramchhunga mi retheite chunga sorkarin surgical strike a neihna a ni, tiin an sawi a ni.

Mahse Modi chuan eptuten mi retheite harsatna thlentu nia an sawi chu a dik loh thu leh, mi retheiten an ṭhatpui zawk tur thu a sawi. ìKan mimal hlawkna tura thawk kan ni lo. Ram mipui, kum 70 chhung zet ngaihthah ni tawh, mi retheite tana thawk tur kan ni. Eirukna, sum chheprelh leh rawlrala chetna thleng ṭhin vangin mi retheite chuan kum 70 zet an lo tuar tawh a ni. Tuna kan hmalakna hi a bul ṭanna chauh a ni a, mi rethei zawk leh mipui nawlpuite ṭhatna turin sorkar chuan thutlukna dang pawh ala siam belh zel dawn a niî, a ti.

PM chuan pawisa note tih thih chungchangah mipuite ngaihdan pawh hriat a duh thu sawiin, Narandra Modi App-a survey an neih mekah ngaihdan thawh turin a sawm.