Parliament aia concert-a thu sawi duh zawkah PM puh

Sorkar laipuiin Rs 500 leh Rs 1,000 note a tih thih chungchangah eptute chuan Prime Minister Narendra Modi chu Parliament-ah thu sawi turin phut mah se, PM hian nimin thleng khan hemi chungchang hi a la sawichhuak lo.

Congress vice president Rahul Gandhi chuan PM chu na taka sawiselin, PM chu Coldpay concert-ah thu a sawi theih laia Parliament-a thu a sawi theih loh chhan a zawt. Modi hian kar kalta Inrinni zan khan Coldpay concert neihnaah video conference hmangin thu a sawi a ni. Rahul Gandhi hian Thawhṭanni khan Delhi-a ATM eng emaw zat tlawhin, pawisa lakchhuak tuma intlarte harsatna neih dante a ngaihthlaksak a ni.

November 16-a Parliament thlasik ṭhutkhawm ṭan a nih aṭang khan eptu party-te chuan pawisa note tih thih chungchangah debate neih phutin rorel mumal theih loin inkhawm hi an la tibuai a, PM chu an zawhna chhang tur leh thu sawi turin an phut a ni. Mahse sorkar lam chuan debate-a eptute zawhna chhangtu tur chu a duh a thlang thei tih a sawi thung a, sorkar lam aiawh hian Finance Minister Arun Jaitley chuan thu a sawi a ni. Nimina Parliament in hnih inkhawm pawh eptuten PM thusawi tura phuta an auh buai leh avangin inkhawm tihtawp a ngai leh a ni.