Ramchhung Lawrkhawm

Eptuten President hmuh an tum

Sorkar laipuiin pawisa note a tih thih avanga ram mipuite chunga harsatna a thlente duh lohna lantirin eptu party 10-a MP-te chuan vawiin hian Parliament Complex-ah sit-in protest huaihawt an tum.

Vawiin-a Parliament Complex-a Mahatma Gandhi lim bula nawrh an huaihawt hnuah, eptu MP-te hian Rahstrapai Bhawan panin kawng an zawh zui dawn a ni. Eptu party intelkhawmte hian President Pranab Mukherjee pawh hmuh an tum a, pawisa thi avanga mi retheiten buaina an tawh dante an sawipui ang.

UP CM hlui a thi

Uttar Pradesh Chief Minister hlui Ram Naresh Yadav chu hun rei tak a dam loh hnu≠in nimin khan Lucknow hospital-ah a thi.

Kum 90 mi, Yadav hi Congress party hruaitu hlun niin, kum 1977-79 chhung Uttar Pradesh chief minister a ni a, kum 1978-1980 chhungin Babu Banarasi Das kaihhruai sorkarah deputy CM a ni. Madhya Pradesh-ah Governor-in, August 26, 2011 - September 7, 2016 chhung a awm bawk. Kum 1977 khan Janata Dal candidate-in Lok Sabha member atan thlan tlin a ni a, kum 1988-1989 khan Lok Dal candidate-in Rajya Sabha-ah thlan tlin a ni a, 1989-1994-ah Congress party ticket-in thlan tlin a ni leh bawk.

Electric rutu factory Rs vbch 1.48 chawi tir

Delhi-a Special Court of Electricity chuan West Delhi-a plastic factory, HP Plastic neitu Ranjit Singh chu a factory-a hman tura 243KW electricity a ruk avangin cheng vaibelchhe 1.48 chawi turin a hrem.

Ranjit Singh Chaudhary-a electric a pawh ruk hi kum 2005 khan BSES Rajdhani Power Ltd -a Enforcement team chuan an man chhuak a ni. A factory chhungah hian electricity meter engmah a dah lo. A thiltih avang hian sum chawi tura tih a ni a, mahse hun tiam chhunga a pek loh avangin FIR thehluh a ni ta a ni. Chaudhary hi pawisa chawi tir a nih bakah, hrehawm taka kum hnih chhung lung-in tang tura hrem a ni bawk. A sum chawi tur hi a pek tlak loh chuan thla ruk dang tan belh tir a ni ang.