Canada Foreign Minister Anita Anand leh EAM inkawm

External affairs minister S Jaishankar leh India tlawha rawn zin Canada foreign minister Anita Anand-te chu nimin khan an inkawm. Anita hian Pathianni khan India a rawn thleng a, charge a lak hnuah official-a India a rawn tlawh vawi khatna a ni. Minister pahnih inkawmna hi PM Modi leh Canada PM Carney-te'n kumin kumtira thawh dunna ṭha neih kawnga hmalak an tumna tihhlawhtlinna kawng khat a ni.

Foreign minister pahnihte hian a ṭha zawnga ram pahnih thawh dunna siam chu an inbiakna neihin a tum ber niin, Canada PM hlui Justin Trudeau thuneihna chan laia in nghirnghona a awm hnuah tun hnai thla eng emaw zat liamta aṭang khan India leh Canada inkar hi a ṭha zawngin hma a sawn mek a ni. Anita rawn zin pawh hi ram pahnih inkar tihhmasawn a nih leh theihna tura ruahman a ni bawk.

Ministry of External Affairs thupuangtu, Randhir Jaiswal chuan intlawh tawnna neih hi thawh dunna thuk lehzuala siamna tur a nih thu leh, kawng hrang hranga thawh dunna tihhmasawnna tur ruahman a nih thu a sawi. Economic cooperation, strategic dialogue, leh mipui leh mipui thawh dunna tihhmasawnna tur thlen thei turah inbiakna neih a ni.