DRDO siam Military Combat Parachute System enchhin

Defence Research and Development Organisation (DRDO) siam, military combat parachute system (MCPS) chu Nilaini khan feet 32,000 a sangah hlawhtling taka enchhin a nih thu official-te chuan an sawi.

Defence Ministry chuan MCPS hi DRDO laboratory pahnih - Aerial Delivery Research and Development Establishment, Agra leh Defence Bioengineering and Electromedical Laboratory, Bengaluru ah siam a ni tih a sawi. Feet 32,000 a sang aṭangin India Air Force-a test jumper-ten free fall jump an nei a, ram chhunga siam chhuah ngei system hi a rintlak tawk hle a ni, a ti.

Defence miniser Rajnath Singh chuan DEFO, armed force leh industry-te chu MCPS hlawhtling taka enchhin a nih avangin a lawmpui thu a sawi. India-in defence lama a mamawhte ram chhung ngei siamchhuah a tumna kawnga thil chhinchhiah tlak leh pawimawh a nih thu a sawi bawk. Department of Defence R&D secretary leh DRDO chairman, Samir V.Kamat pawhin DRDO team chu fakin, aerial delivery system-a ram intodelh nih tumna kawnga hmasawnna pawimawh tak a nih thu a sawi ve bawk.