Karnataka leh Maharashtra chhawmdawlna tur HM in pawm

Union home minister Amit Shah chuan, Karnataka leh Maharashtra-a tuilian tuarte chhawmdawlna tur, State Disaster Response Fund (SDRF) aṭanga second installment atana sorkar laipuiin a tum ve tur Rs vbc 1,950.80 pek chhuahna tur a pawm. Sum pek turah hian Rs vbc 384.40 chu Karnataka chan tur niin, Maharashtra-in Rs vbc 1,566.40 an chang ve thung dawn a ni.

Sorkar laipuiin SDRF atana a sum tum tur hi state pahnih te'n fur laia tuilian an tawrh chhawmdawlna atana tih niin, hemi hmang hian rang zawka chhawmdawlna pek theih a nih phah dawn niin official chuan an tarlang. Sorkar laipui chuan tuilian, ruah bing sur, leh leimin vanga harsatna tuar state-te chu chak zawka puihna pek zel a tum tih official thuchhuah chuan a tarlang bawk.

Kumin chhungin sorkar laipui hian SDRF hnuaiah state 27 hnenah Rs vbc 13,603.20 a pe chhuak tawh a, National Disaster Response Fund (NDRF) aṭangin state 15 hnenah Rs vbc 2,189.28 a pe chhuak tawh bawk. Heng bakah hian State Disaster Mitigation Fund (SDMF) aṭangin state 21 tan Rs vbc 4,571.30 leh, National Disaster Mitigation Fund (NDMF) aṭangin state pakua tan Rs vbc 372.09 an pe chhuak tawh a ni.

Sum hmanga puihna hrang hrang bakah hian hmanrua leh chhanchhuah hna leh chhawmdawlna thawktu hmanga puihna hrang hrang pawh tirh tawh niin, National Disaster Response Force (NDRF), Army leh Air Force te tirh an ni. State leh UT 30 a chhanchhuah hna thawk tur hian NDRF team 199 a tir chhuak tling tawh.