RJD candidate nomination file hnuah man

Bihar assembly inthlanna neih tura Rashtriya Janata Dal (RJD) party aiawha chuh tura nomination thehlut, Satendra Sah chu nomination a file hnuah man a ni zui nghal. Sah hian Sasaram assembly seat-a chuh turin nomination hi a theh lut a, mahse, Jharkhand police chuan non-bailable warrant (NBW) hmangin an lo man a ni.

Sah man a nih chhan amah thlawptute pawhin engmah an hriat loh thu an tarlang. Nomination paper hi thehluh phalsak a nih hnu lawkah an man zui nghal a, police pawhin man a nih chhan an tichiang lo. RJD candidate bakah hian, INDIA bloc hnuaia mi pahnih, Jitendra Paswan leh Satyadeo Ram chu man an lo ni tawh bawk.

Bihar inthlan chuh turin RJD candidate 143 chuan nomination an theh lut fel tawh a, an thawhpui INDIA bloc candidate nen hian seat riatah an in sut a ngai dawn a ni. Hetih laiin Congress party aṭangin inthlan chuh tum mi 61 in hming an theh lut ve bawk. Bihar inthlan atana nomination thehluh theih hun hi Thawhṭanni khan a tawp a ni.

Bihar Assembly-ah hian seat 243 awmin inthlan hi thawh hniha neih a ni dawn a, November 6 leh 11 ah vote thlakin, inthlan result hi November 14 ah puan a ni ang. Inthlan neih turah hian INDIA bloc-a tel, Congress leh RJD chu candidate an in file hnan vangin an inkar a chhiat phahin, boruak pawh a ṭhat loh phah a rinawm.