India-in Kabul-a mission; embassy pangngaiah siam dawn

India chuan Kabul, Afghanistan-a technical mission chu embassy puitlingah a siam dawn tih ministry of external affairs (EAM) thuchhuah chuan a tarlang. Embassy thara siamna tur hian Afghanistan-a rorellai Taliban foreign minister Amir Khan Muttaqi-a'n India a rawn tlawh hnuah thutlukna siam a ni a, rang taka hma lak nghal a ni ang.

MEA thuchhuah chuan," Afghan foreign minister-in India a rawn tlawh hnuah sorkar laipui chuan Kabul-a technical mission chu Afghanistan-a India embassy turin a tidanglam a, hei hi rang taka hman nghal tur a ni. Thutlukna hi India-in thuk zawk leh nghet zawka thawh dunna siamna tura a tih a ni," tiin an tarlang. Official chuan ambassador mumal ruat a nih hmaa embassy enkawl tur hian chargé d’affaires (CDA) pawh a rang thei angin a ruat dawn tih a sawi. Technical mission tihchangtlunna tur hian external affairs minister S. Jaishankar leh Muttaqi te chu Hyderabad House-ah an in dawr a ni.

Iran, China, Russia, Gulf ram leh Central Asian ramte chuan Taliban hi dawr tawh mah se official-a Afghanistana roreltua pawmna chu Russia chiah hian ala tichhuak thung.

India hian August 2021-a Taliban-in civil sorkar an paithlak hnu khan Kabul-a embassy-a thawktu zawng zawng hruai chhuakin a khar zui a, hei bakah Indian consulate Mazaar-i-Sharif, Jalalabad, Kandahar leh Herat a mi pawh a khar zui bawk. June 23, 2022 khan mission enkawl tur hian technical team a tir leh chauh a ni.