Uttarakhand-in online-a damdawi zawrh khap dawn

Ram chhung hmun hrang hranga khuh damdawi him lo ei vanga naupang 20 chuang an thih hnuah, Uttarakhand sorkar chuan online kaltlanga damdawi zawrh chhuah ṭhin chu mipui himna turin an khap dawn tih a puang. State sorkar hmalakna thar hi tun thla tawp aṭanga hman ṭan theih beisei a ni.

Uttarakhand-a Food and Drug Administration (FDA) chuan an hmalakna kalpui tur hi ram puma hman a nih theihna turin sorkar laipuiah ngenna an thlen tawh tih an tarlang bawk. Sorkar laipuia kalpui ve tura ngenna an thlen hi online kaltlanga damdawi lei ṭhinte him tawk loh theihna nasa tak a awm vang tih sawiin, damdawite online a zawrh chu khauh zawka khuahkhirh a ṭul hle tih an tarlang.

Tajbar Singh Jaggi, FDA Additional Commissioner chuan Nilaini khan Uttrakhand ni lo state dang eng emaw zat pawhin online hmanga damdawi zawrh khap an tum thu pawh a lo tichiang tawh niin a sawi.

Covid 19 hri len hnuah online hmanga damdawi zawrh hi a tam zual a, Uttarakhand-ah hian online leh home delivery tithei damdawi dawr 20,000 chuang inziak lut an awm. FDA official chuan heng aṭang hian state-in pawisa cheng vaibelchhe tel a la lut niin an tarlang.