Bihar inthlan turah INDIA bloc CM candidate atan Tejashwi Yadav ruat

Bihar assembly inthlan lo awm tura INDIA bloc ṭangrual pawl chief minister candidate atan Rashtriya Janata Dal (RJD) hruaitu, assembly-a Leader of Opposition ni mek Tejaswhi Yadav chu ruat a ni.

All India Congress Committee (AICC) senior observer Ashok Gehlot chuan Nilaini khan Patna-ah chief minister candidate tur hi a puang a, he hunah hian INDIA bloc hnuaia party hrang hrang hruaitute an tel. Deputy chief minister candidate atan Vikassheel Insaan Party (VIP) hruaitu Mukesh Sahani ruat a ni bawk. Gehlot chuan INDIA bloc-a thawk ho zawng zawng chuan Tejashwi Yadav chu CM atan an pawm vek tih sawiin, inthlan lo awm tur pawh lungrual taka an chuh ho tur thu a sawi. Sorkarna an siam thei a nih chuan hnam aiawh tur deputy CM dang pawh ruat belh a ni dawn tih a sawi bawk.

Kum 35 mi, Bihar chief minister hlui Lalu Prasad Yadav-a fapa, Tejashwi hi kum 2020 assembly inthlanah khan ṭangrual pawl, Mahagathbandhan CM candidate atan ruat a lo ni tawh bawk a, mahse, inthlanah hian seat 12 in sorkarna an siam pha ta lo a ni.

Bihar assembly inthlan hi November 6 leh 11 hian neih a ni dawn a, November 14-ah vote tla chhiarin inthlan result puan a ni ang.