Pawngsual leh tualthatte chunga hremna rang taka lekkawhna turin IPC leh CrPC siamṭhat a ni dawn: Kishan Reddy

Union minister of state for home G Kishan Reddy chuan Inrinni khan pawngsual leh tualthatte chunga hremna rang taka lekkawh a nih theihna turin Indian Penal Code (IPC) leh Code of Criminal Procedure (CrPC) siamṭhat a ni dawn tih a sawi.

Kishan Reddy chuan tun dinhmunah chuan thiam loh chan tirte chuan upper court ṭhenkhatah leh high court-ahte appeal lehin hei hian hremna an hmuh tur a tikhawtlai nasa hle tih a sawi a, hemi a nih avang hian sorkar laipui chuan court 'trial' chu Supreme Court-ah chiah khin theih turin rawtna an siam mai thei tih a sawi bawk.  

IPC leh CrPC chu British hunlaia British ho siam a ni tawh avangin siamṭhat a hun tawh tih sawiin,"Bureau of Police Research and Development (BPRD) chuan a siamṭhatna tur draft pawh an buatsaih vek tawh a ni," a ti. 

Mipuite hnenah pawh hmeichhe laka pawikhawihna leh pawikhawitu hremna tur chungchangah rawtna an nei a nih chuan a hnenah thlen turin a ngen bawk.

MoS G Kishan Reddy hian Inrinni khan kar liam ta Nilaini zana Hyderabad khaw daia awm Shamshabad-a mi paliin an pawngsual rawn hnua an thah zui tak vety doctor nula chhungte a bia a, hemi zawh hnua thuthar thehdarhtuten an kawmnaah IPC leh CrPC siamṭhat a nih tur chungchang hi a sawi a ni.

Reddy chuan sorkar laipui leh Telangana sorkar chu hemi chungchangah hian an inbe reng tih sawiin pawikhawihtute pawhin hremna na thei ang ber an hmuhna turin hma an la tih a sawi.

Kishan Reddy chuan mipui thinrimna pawh a hriatpui thu sawiin, state sorkar pawhin mipui duhdan hre chunga hma an lak ngei a rin thu a sawi.  Shamshabad thilthleng chu a dem thu leh mihring mihrinnaah pawh thil zahpuiawm tak a ni, a ti. Kum 2012-a Delhi-a Nirbhaya-a thilthleng hnua pawngsuala tualthah thubuaiin ram pum a tih thinrim lehna a nih thu a sawi bawk.

Kar liam ta Ningani zan khan Sham­shabad-a veterinary doctor, hmeichhia kum 26 mi chuan a haw tur a scooty a ke a lo thep tih mi pahnihin an lo hrilhin an siamsak theih thu an hrilh nghal bawk a, heihi CCTV aṭang pawhin a hmuh theih a ni.

Hemi hnu hian a unaunu call in a hlauh­thawn thute pawh a sawi a, hemi hnu deuha a unaunuin a call let leh tur hi a phone a in off tawh avangin police hnenah thubuai an ziak lut a, Ningani zing dar 6 velah khan a ruang hi ut vekin culvert-ah an chhar zui a, pawikhawihtute pawh hi man chhuah an ni tawh bawk.