PM Modi-a'n Trump hlauh vangin ASEAN meet tel lo: Congress

Congress party chuan prime minister Narendra Modi-a'n ASEAN (Association of Southeast Asian Nations) summit, Kuala Lumpur, Malaysia-a October 26-28 chhunga neih tur virtual hmanga a tel tur chu US president Donald Trump a taka hmachhawn a hlauh vang a ni, an ti.

Congress communication chief, Jairam Ramesh chuan PM Modi-a'n summit a tel loh chhan chu Trump-a'n Operation Sindoor leh India-in Russia oil lei titawp tura a intiam anga a sawi hnuah a taka inhmuh chu thil tih chi nia a ngaih loh vang a nih thu X-ah a tarlang. Hei bakah Modi chuan Gaza peace summit, Egypt-a tel tura sawmna pawh a lo hnawl tawh niin an puh bawk.

Ramesh chuan," President Trump fakna social media a tarlan chu thil pakhat ve mai a ni a; mahse, Operation Sindoor tihtawpna tura vawi 53 ngawt a nawrna vanga thleng leh Russia oil lei tawh lo tura intiam anga vawi nga ngawt lo sawi tawhtu a taka han hmuh chu PM Modi tan thil tihchi a ni lo a ni. PM hian Bollywood film 'Bachke rehna re baba, bachke rehna re' a hre chhuak ram ram tawh ang," a ti.

ASEAN summit neih tur chungchangah hian PM Modi chuan Ningani khan X kaltlangin Malaysia prime minister Anwar Ibrahim hnenah summit chu virtual hmanga a tel zawk tur thu a hrilh. PM Modi hian a chhan erawh a tarlang lo a, ministry of external affairs lam pawhin hemi chunchangah hian engmah sawi an la nei lo.