Cyclone thleng thei vangin NCMC meeting

India Meteorological Department (IMD) chuan Inrinni liam ta khan Bay of Bengal chhim thlang lamah cyclone 'Montha' thawk mai thei tura inmung awm vangin hriattirna a tichhuak. Cyclone thleng thei laka lo inpuahchah dan tur ngaihtuahin National Crisis Management Committee (NCNC) chuan cabinet secretary T. V. Somanathan kaihhruaiin meeting an nei nghal.

Cyclone Montha hi October 28, naktuk zan hian Kakinada bawra Machilipatnam leh Kalingapatnam tuipui kam inkar, Andra Pradesh chhehvela thawk tur niin IMD chuan an tarlang. Cyclone hian 90-100 kmph a nain a thawh rin a ni a, ruah a keng tel tura ngaih a ni bawk. Hemi vang hian October 26-29 chhung chu tuipui depa awmte chu fimkhur tur leh inralring turin an chah nghal a ni.

Tamil Nadu, Andhra Pradesh, PuDucherry-a chief secretary leh Odisha-a additioanl chief secretary-te chuan mipuite chu sahimna zawng tur leh invenna tur kawng hrang hrang dap turin hriattirna an tichhuak bawk. Committee chuan thlipui thawk thei avang hian tawmhulna bakah sahimna pan tura inhruai chhuahna mumal tak siam turin NDRF leh SDRF team-te a hriattir tawh bakah, district control room pawh thil thleng thlithlai reng tura inpeih turin hriattir an ni bawk.

Thlipui tleh laka invenna tura lo inhmakhua theih dante thlirin, central agency leh state sorkar hrang hrang, cyclone kalkawng ni thei state-te chu nunna chan an awm loh theih dan tura inbuatsaih turin hriattir an ni. Hei bakah infrastructure nghawng chhe lo thei tura inpuahchah turin an hriattir bawk. Cyclone Montha thleng thei vang hian Indian Army pawh East Central Arabian Sea leh South East Bay of Bengal ahte darkar 48 chhung inralring turin dah an ni.