Uttarakhand-in state pawn lirthei lut tan Green Tax la dawn

Uttarakhand chuan December aṭangin state pawn aṭanga lirtei lut reng rengah Green Tax an la dawn tih official chuan an puang. He hmalakna hi state chhunga boruak bawlhhlawh tur tihziawmna te, environment venhimna leh faina kenkawhna tura tih a nih thu an sawi.

Green Tax lak dan turah hian lirthei azirin chawi ngai zat bithliah a ni a, lirthei te chi ah Rs 80, bungraw phur lirthei te chi ah Rs 250, bus-ah Rs 140, truck-ah a rih dan a zirin Rs 120-700 thleng chhiah lak a ni ang. Transport department chuan green tax lakhawm tur hian vendor company an ruat nghal bawk.

State additional transport commissioner, Sanat Kumar Singh chuan Inrinni liam ta khan state chhunga lirthei chhinchhiahna turin state ramriah Number Plate Recognition (ANPR) camera 16 dah a nih tawh thu a sawi. Mumal zawka chhinchhiahna kalpui a nih theihna tur hian a dang 37 dah belh tum mek a nih thu a tarlang.

Camera hmanga thlalak data-te hi software hmangin vendor hnenah thawn zel tur a ni a, hemi hnu hian Uttarakhand registration ni lote chu thliar hran leh a ni ang. Registration chhinchhiahte hi National Payments Corporation of India (NPCI) database-ah thawn zel an ni dawn tih Singh chuan a sawi.