PM Modi-a'n 'Vande Mataram' kum 150 lawm turin mipui chah

Prime minister Narendra Modi chuan nimin khan thla tina radio kaltlanga thusawina hun a hman ṭhin, 'Mann Ki Baat' chu hmang lehin, national song 'Vande Mataram' in kumina kum 150 a tlinna pualin ram tana a hlutna leh hnam ro a nihna pholang thei tura lawmna nei turin mipuite a sawm. 'Vande Mataram' hi kum 1870 chhoa Bankim Chandra Chattopadhyay phuah niin, kum 1882 khan a novel, 'Anandmath' ah a tichhuak a, kum 1959 khan India national song ah puan a ni.

PM Modi hian minute 30 chhung thu a sawi a, ram mipuite hmalakna pawimawh tak tak tarlangin, Gujarata mangroves humhalhna leh tihpunna kawnga hmalakna te, Chhattisgarha garbage cafe siam leh Bengaluru-a dil humhalhna kalpuinate chu a fak bawk. Hei bakah hian paramilitary force, BSF leh CRPF te'n India ui breed an unit-a an hmang chu a fak bawk.

India thar chhuah coffee khawvel huapa chawilar a ni chu lawmawm a tih thu Modi chuan sawiin, coffee thar chhuah hmang hian hmeichhe tam takin nun nuam tak an hman theih phah niin a sawi. Hei bakah hian Sanskrit chawi lar a ni leh ṭhalai naupang zawkin an hmang uar chu India culture chawi nunna pawimawh tak a nih thu a sawi.