Eptu MP-te’n lungawi lohna lantir

Congress vice president Rahul Gandhi kaihhruaiin nimin zing khan eptu MP 200 chuangte chuan, sorkarin pawisa note a tih thih avanga mipuite chunga harsatna lian tak thleng duh loin, Parliament complex-a Mahatma Gandh lim bulah lungawilohna an lantir.

Rahul Gandhi chuan ram pumah bank leh ATM aṭangin pawisa lak chhuah tumin mipui tam tak an intlar thu a sawi. Kawng hrang hranga BJP kaihhruai NDA sorkar hmalakna thlawptu, Jayalalithaa-i party AIADMK pawhin nimina nawrh huaihawt hi an thlawp.

BJP thawhpui, Shiv Sena chuan pawisa note tih thih hi a tirah nasa takin sawisel mah se, a thu a sawn leh a, Prime Minister Narendra Modi-a hmalakna chu eiruk leh sum chheprelh do letna tura thutlukna huaisen tak a ni, a ti. Shiv Sena MP-te hian Thawhlehni khan PM Modi hi an hmu a, pawisa note tih thih chungchanga sorkar tlutlukna chu an thlawp zel tur thu an hrilh.

West Bengal Chief Minister Mamata Banerjee pawhin nawrh huaihawtnaa tel tur hian Delhi hi a pan leh a, Jantar Mantar-ah lungawi lohna lantir chhunzawm a tum.

Nimin thleng khan eptuten Prime Minister Modi chu pawisa note tih thih chungchang Parliament-a sawifiah tura an phut avangin rorel thei loin an la in aubuai a ni. PM hi nimina Lok Sabha inkhawmah tel mah se, thu a sawi lo. Eptute chuan PM chu House pawn lamah pawisa note tih thih chungchangah a
ṭawngchhuak thei reng a, House chhunga engmah a sawi duh lo chu an hriatthiam loh thu an sawi.

Eptute chuan pawisa lakchhuah tuma intlarnaah leh harsatna dang a thlen vangin mi 70 in nunna an chan phah tawh niin an sawi. Thi chhungte hnenah sorkar laipui chu thupha chawi tura an phut bakah, zangnadawmna cheng nuai 10 ṭheuh pe turin an phut bawk.