Ramchhung

IS thlawptu mi 68 man tawh

Ram chhung hmun hrang hrangah Islamic State (IS) firfiak pawl thlawptu leh puitu mi 68 man an ni tawh.

Mi 68 te hi state hrang hrang aṭanga man an ni a, an zinga mi 50-te chu National Investigation Agency (NIA) kuta hlan an ni. Maharashtra leh Telangana state-ah mi 11 ve ve man an ni tawh a, Karnataka-ah mi pasarih, Kerala-ah mi paruk, Uttarakhand-ah mi pali, West Bengal, UP leh Tamil Nadu-ah pahnih ṭheuh leh, Rajasthan, Delhi, Madhya Pradesh, J&K leh Bihar-ahte pakhat ṭheuh man an ni bawk.

Delhi-ah motor park dik lo hnenah challan 5,59,264 pe chhuak

Kumin chhungin Delhi khawpui chhung a, phalna hmun ni loa motor park hnena challan pekchhuah chu 5,59,264 a tling tawh niin Lok Sabha-ah tarlan a ni.

Union Minister of State for Home Affairs Hansraf Gangaram Ahir chuan New Delhi area-a kawngpuite chu parking lot-ah an chang tawh nia sawi chu ziakin a chhang a ni. Kumin November 15 thleng khan motor park dik lo leh a park lohna tur hmunah dah hnena challan pek chhuah chu 5,59,264 a tling tawh a, motor 1,43,220 hnuhsawn sak ni tawhin, motor 29,119 hrensak an nih tawh bawk niin Ahir chuan a sawi.

Pawisa lakchhuah theih loh vangin intihlum

Uttar Pradesh-a Mavai Buzurg khuaa zirlai pakhat chu bank aṭanga exam fee tur pawisa a lakchhuah theih loh avangin a intihlum.

Kum 18 mi, Suresh hian pawisa note tih thih a nih hnuah a exam fee pek a ngaih avangin ni rei tak chu bank aṭanga pawisa lakchhuah tum hian a intlar tawh a, mahse mipui intlar an tam theih avangin a la≠chhuak thei lo a, Thawhlehni khan an inah a inawkhlum ta a ni. Suresh hi Panchnehi Degree College-a B.Sc second year zirlai a ni a, nimin khan exam fee hi pekfel a ngai a ni. He thil thleng avang hian khaw mipui thinrim chuan lungin bank hi an tawng zui a ni. Thawhṭanni khan Tindwari-ah hmeichhe naupang pakhat damlo chu a enkawlna tur sum a pa-in a lakchhuah theih loh avangin bank compound-ah a thi tawh bawk.