India leh Switzerland-in bank info inhrilh tawn dawn

India leh Switzerland chuan bank account neitute chanchin kimchang inhrilh tawnna tur inremna, Automatic Exchange of Information (AEOI) an ziak a, he inremna hi kum 2019, September thla aṭangin hman ṭan a ni ang. He inremna hi sorkar laipuiin ram pawna sum chheprelhte dapchhuah a tumna kawnga thil ṭangkai tak a ni dawn a ni.

Kum 2019, September thlaah India chuan Switzerland hnen aṭang hian kum 2018 chhunga an rama India mi bank account neite sum dah dan kimchang a hre thei tawh dawn, a kum lehah pawh hetiang hian an inhriattir tawn zel dawn niin finance ministry thuchhuah chuan a tarlang.

Prime Minister Narendra Modi kaihhruai sorkar hian rampawn lama sum chheprelh haichhuah a, sum chheprelh ṭhin tihtawp tura a beih tur thu a lo sawi fo tawh a, hemi atan hian thuneitute pawhin Switzerland ram thuneitute pawh ṭum eng emaw zat an lo dawr tawh a ni.

Ram pahnihten AEOI inremna an siamah hian Central Board of Direct Taxes chairman Sushil Chandra leh India rama Swiss embassy deputy chief Gilles Roduit-teín an hming an ziak.