LoC-ah sipaiten beihpui thlak

Indian army chuan Jammu and Kashmir-a Pakistan ramri, Line of Control-a India sipai pakhat a lu tansak a, mi dang pahnih kahhlum an nih hnuah Pakistan lam chu nasa takin an kap let.

Thawhlehni khan Paksitan commando-te chuan Machil-ah LoC rawn paltlangin, sipai pakhat lu an tansak a, pahnih an kaphlum bawk. Kar thum liamta khan he hmun aṭanga hla vak loah hian India sipai pakhat chu a lu tansak a lo ni tawh bawk.

He thil thlen vang hian sipaite chuan Poonch, Rajouri, Kel leh Machil-ah Pakistan sipai post-te chu an kap let nghal a, Pakistan beihna atan hian 120mm mortar leh machine gun-te an hmang.

India sipai-te hi Kashmir hmarlam, Machil sector-a an patrol laiin Pakistan army-a Border Action Team-te chuan an lo ambush a ni. He sector-ah hian Indian post awmna chuan hmun dang aiin Pakistan ram a hnaih zawk a, a ram a chhengchhiat bakah ramngaw a chhah avangin India rama luh ruk tumte tan hmun remchang a tam a ni.

Pakistan chuan he thil thleng hi a dik lo tih sawiin, report chu thu dik lo leh belh chian dawl lo a nih thu a sawi thung.