Mi tam zawkin PM hmalakna thlawp Eptuten survey an pawm lo

Prime Minister Narendra Modi-aín Rs 500 leh Rs 1,000 tih thih a nih chungchang a, mipuite an ngaihdan hrilh tura a ngenna chhangtu zinga 90% chuangin a hmalakna an thlawp.

PM Modi hian Narendra Modi App kaltlangin mipuite chu an ngaihdan thehlut turin a zawt a, November 23, tlai dar 3.30 thlenga zawhna chhangtu chu mi nuai nga chuang an tling tawh a ni. Heng zinga 90% chuan sorkarin sum chheprelh tihtawp a nih theihna atana a hmalakna chu ṭha tiin four-star rating an pe a, 73% in five-star rating an pe. Mi nuai nga chuang chhangtu zinga 2% chauhin pawisa tih thih chu ṭha lo an ti. Survey result hi Prime Minister Office website-ah tarlan a ni.

Hetihlai hian eptute chuan PM-in survey a buatsaih chu an pawm lo tih an sawi a, survey a neih chu phuahchawp leh sorkarina a duh dan anga a siam tir mai niin an sawi. BSP hotu Mayawati-i chuan sorkar laipuiin pawisa note a tih thih chungchanga mipuite ngaihdan dik tak hriat a duh a nih chuan Lok Sabha ṭhiat a, inthlan ṭhat buatsaih turin Prime Minister Narandra Modi a phut.

Eptute chuan survey buatsaih chu smartphone neite chauhin an chhang thei a, mipui tam zawkin an chhan ve theih loh avangin mipui aiawhtu anga pawm theih an ni lo, a ti. Hei bakah hian zawhna siamte chu a duh lo zawnga chhan theih loha siam a ni, a ti.

Samajwadi Party MP Naresh Agrawal chuan kum 1970 chhoa emergency puan a nih lai khan, khatihlaia Prime Minister Indira Gandhi pawhin mipuite ngaihdan lain, a hmalakna thlawp zawng vekin an chhang tih a lo sawi tawh a ni, a ti.

Union Minister Nirmala Sitaraman chuan eptute beihna hi chhang letin, pawisa note tih thih chungchang chu mipuiten an thlawp tih a sawi a, a hrechiang duh chu khawlaiah chhuaka mipuite zawtfiah mai turin a ti.

Nimina Lok Sabha rorel inkhawm chu pawisa note tih thih chungchang sawiho phuta eptu member-te an aubuai avangin rorel thei loin tihtawp a ni leh. Congress, Trinamool Congress leh Samajwadi party member-te chu House laiah chhuak khawmin, sorkar laka lungawi lohna thute an aupui a, Speaker Sumitra Mahajan chuan inkhawm a tihtawp phah a ni.