Ramchhung

SC-in Bihar MLA bail a cancel sak

Supreme Court chaun Bihar-a RJD MLA, school naupang kum 15 mi pawngsuala puh, Rajballabh Yadav-a bail-a chhuah tir chu tihtawp sakin, jail-a dah lut leh turin thupek a tichhuak.

Yadav hi thla hmasa khan Bihar court chuan bail-in a chhuahtir a, Chief Minister Nitish Kumar chu Supreme Court-ah a zualko a ni. Rajballabh Yadav hian kumin February thla khan a chenna inah kum tling lo a pawngsual nia sawi a ni. Protection of Children from Sexual Offences Act hnuaiah thubuai siamsakin jail-ah dah a ni. Thla ruk a tan hnuah Patna High Court chuan October thla khan bail-a chhuah a dilna chu a pawmsak a ni.

Sorkar laipuiin Delhi CS a thlak

Sorkar laipui chuan Delhi sorkar-a Chief Secretary Kewal Kumar Sharma chu nimin khan thlakin, Sharma hi HRD Ministry-a Department of Higher Education Secretary-ah a dah.

Sharma hi 1983 batch IAS officer of Union Territories cadre a ni a, nikum March 9 khan Delhi sorkara Chief Secretary atan dah a ni. Kum 1958, February 2-a piang a ni a, service hi kum khat chuang a la nei. A service tawp hmaa sorkar laipuiin a thlak avang hian PM Modi-a kaihhruai leh Delhi-a AAP sorkar inkarah inbeihna a siam thar leh rin a ni.

Reliance refinery-a kangmei chhuakah mi 2 thi

Gujarat-a Jamnagar-a Reliance Industries refinery complex-ah nimin khan kangmei a chhuak a, mi pahnih an thi a, mi dang parukin hliam an tuar.

Police official-te chuan kangmei hi zing dar 3 vela chhuak a nih thu leh, Moti Khavdi refinery-a gas leak vanga chhuak niin an sawi a, mi pariatin hliam tuarin Guru Govindsinh Hospital (G G Hospital)-ah hruai an ni a, an zinga pahnih chu an hliam tuar loin an thi a ni. RIL pawhin thuchhuah siamin, an unit pakhata kangmei chhuak chu Reliance fire brigade-ten an ṭhelh thu leh, unit dangte erawh a nghawng buai loh thu a sawi.