EAM-in ASEAN summit kar lakah ram dang hruaitu kawm

External affaris minister S. Jaishankar chuan nimin khan Kuala Lumpur, Malaysia-a Association of Southeast Asian Nations (ASEAN) summit neih karlakah ram hrang hrang hruaitute a kawm. Ram dang hruaitute hi thawh hona leh hmasawnna tur hrang hrangte a sawipui. Summit thlengtu, Malaysia prime minister Anwar Ibrahim pawh a kawm bawk. ASEAN hi Malaysia chair-na hnuaiah a awm mek a ni.

Jaishankar-a'n ram hruaitu a kawm zingah hian US secretary of state Marco Rubio pawh telin, India leh US insumdawn tawnna tur chungchang tihfel a ni hlei thei lo chungin thawh dunna tur siam ṭhatna lam an sawi dun theih thu X-ah a tarlang. India leh US hian insumdawn tawnna kalpui tur hian ṭum nga inbiakna an nei tawh a, tihfel a la ni lo thung.

EAM chuan Singapore, Thailand, leh Republic of Korea foreign minister-te a kawm bawk. Korea foreign minister nen hian automotive, electronic, semiconductor, defence leh lawng siam kawnga thawh dunna turte an sawi dun a, Thailand leh Singapore foreign minister-te pawh thawh dunna tihchakna tur chungchang a sawi pui bawk.

Ram 11 intelkhawmna, ASEAN summit-ah hian member ram bakah ASEAN-in a thawhpui ram hrang hrang US, China, Japan, leh Australia aṭangin aiawh an tel.