Pawisa note thi thleng theih tawh loh Dec thla chhung bank account-ah deposit theih

Sorkar laipui chuan Rs 500 leh Rs 1,000 note thi bank-a thleng theih hun a bituk chu Ningani zan zanlai khan a tawp ta. Pawisa note thi te hi bank-ah thleng theih an ni tawh dawn lo a, mahse bank account-ah erawh December thla chhung a dahluh theih thung. 

Sorkar chuan pawisa note thleng theih hun a tihtawp rual hian, Rs 500 note hlui hman chhunzawm  theihna tur a bithliah a, Rs 1,000 erawh hman chhunzawm theih a ni lo ang. Pawisa note hlui la hman theihna tur te chu -

ρ Central school, state sorkar school, municipality leh local body school a, school fee Rs 2,000 chin pekna atan a la hman theih. 

ρ Central leh State Goverment college-a fee pek nan. 

ρ Pre-paid mobile top-up, Rs 500 chin thuntirna atan.

ρ Consumer Cooperative Store aṭanga Rs 5,000 chin leina atan. 

ρ Tui leh electric bill pekna atan. 

ρ Petrol pum leh sorkar hospital-ahte note hlui hi pawm ala ni ang. 

ρ Doctor prescription nen damdawi dawr hrang hrangah hman theih a ni.

ρ Government emaw public section hnuaia rail ticket counter, bus ticket counter leh airline counter-ahte ticket leina atan hman chhunzawm theih a ni. 

ρ LPG gas cylinder lei nan. 

ρ Court fee pek nan.

ρ State sorkar outlet-a thlai chi lei nan. 

ρ Highway toll-ah December 3-15 chhung≠in fee pekna atan Rs 500 note hlui hman phalsak a ni. 

ρ Ramdang mi tan, kar khatah Rs 5000 chin an ram pawisaa thleng phalsak an ni. 

Reserve Bank of India chuan pawisa note hlui chu bank-ah deposit a, ATM leh cheque hmangin pawisa note thar lakchhuah tawh tur tih a sawi. Pawisa note hlui hi kumin chhungin bank-ah deposit phal a la ni dawn a ni. Bank account la nei lote chu an pawisa a thih mai loh nan account hawng turin a chah nghal bawk. 

Sorkar chuan bank account aṭanga kar khat chhunga pawisa lakchhuak theih zat, Rs 24,000 a bithliah chu thlak danglam a la ni lo. ATM aṭangin ni khatah card pakhat
aṭangin  Rs 2,500 lakchhuah theih a ni bawk.