Dec 2-ah pawisa tih thih vanga petition lutte ngaihtuah dawn

Supreme Court chuan sorkar laipuiin Rs 500 leh Rs 1,000 note a tih thih chung­chang a, court-a petition thehluh zawng zawngte chu Decmeber 2 khian a ngaih­tuah dawn. Chief Justice of India TS Thakur chuan, petition thehluhte hi ngaihthah mai chi an ni lo tih sawiin, eng thil nge tih theih tih ngaihtuah a ngai a ni, a ti.

Petition thehluttu pakhat aiawha ding, Senior Supreme Court lawyer Kapil Sibal chuan bank leh ATM-ah pawisa thar lak­chhuah tur an indah loh avangin mi tam tak chu kawtthlerah rilṭamin an awm mek a ni, a ti. Lawyer dang Manohar Lal Sharma pawhin pawisa tih thih vanga tuar nasa ber chu mipui nawlpuite an ni a, political leader-te chu an buai phah ve lo niin a sawi bawk.

Sorkar laipuiin high court leh subordinate court-a petition thehluhte chu stay turin Supreme Court-a a ngenna chu court hian a hnawl a ni. Pawisa note tih thih chungchanga sorkar khinna hi 10 thehluh a ni a, hengte hi Delhi, Bombay, Karnataka, Kerala, Andhra Pradesh, Calcutta leh Rajasthan high court leh, Mumbai-a civl court-ahte thehluh a ni.