PM hluiin sorkar inbuatsaihna ṭha tawk loah puh

Ningani khan Rajya Sabha-ah pawisa note tih thih chungchang sawiho a ni a, he hunah hian Congress hruaitu, Prime Minister hlui leh economist Manmohan Singh chuan thu a sawi a, he thil hi mi rethei zawkte rawkna leh an chhiatna thlen theihna tur a ni, a ti.

Reserve Bank of India Governor hlui, Finance Minister hlui leh economic reform dintu, Manmohan Singh hi pawisa note tih thih chungchanga House-a a
ṭawngchhuah vawi khatna a ni. Singh chuan PM Modi-a’n an hmalakna black money leh pawisa lem titawpna atan te, firfiakte sum che­vel hrekna atana a ti chu a hnial lo tih a sawi a, mahse sorkar-in pawisa note tih thih chungchang a kalpui danah chuan a inbuatsaih ṭha tawk lo hle tih a lang niin a sawi.

Pawisa note thi tuartu ber chu mipui nawlpui, mi rethei zawkte an ni tih sawiin, bank-ah duh ang zat sum a dahluh theih laia, duh ang zat sum a lak­chhuah leh theih si loh chuan a ṭhat tawk loh zia a tilang chiang a ni. Hetiang hi ram dangah a thleng ve em tih PM hnen aṭanga hriat a duh thu a sawi bawk.

Singh chuan pawisa note tih thih hian ram economy pawh a nghawng dawn a, ramchhunga thil tharchhuah hmanga sum lakluh pawh a tlem berah 2% in a tlahniam thei dawn a ni, a ti. PM Modi-a’n ni 50 chhungin buaina zualpui a reh ang tia mipuite nghak tura a ngen chungchang pawh sawiin, Singh chuan mi rethei leh dinhmun chhe zawkte tan ni 50 chhung chuan chhiatna nasa tak a thleng hman a ni tiin, mi 60-65 in nunna an chan phah tawh thu a sawi bawk.