SIR thawh hnihna state/UT 12-ah kalpui dawn

Election Commission of India (ECI) chuan Thawhṭanni khan electoral roll enawnna, Special Intensive Revision (SIR) thawh hnihna chu nimin aṭang khan buaipui ṭan a nih thu a puang. SIR thawh hnihna hi state/UT 12-ah kalpui a ni dawn.

Roll ennawnna hi a hmasa ber atan Bihar-a kalpui a nih hnuah rampum huapa kalpui tura tih a ni. A thawh hnihnaah hian state pakua leh Union Territory pathumahte neih a ni ang. SIR hi November 4 aṭanga December 4 chhunga neih tur niin, nakkum February 7-ah voter list tihchhuah hman tum a ni bawk.

State pakua SIR kalpuina turte hi Chhattisgarh, Goa, Gujarat, Kerala, Madhya Pradesh, Rajasthan, Tamil Nadu, Uttar Pradesh leh West Bengal niin UT pathum Andaman & Nicobar, Lakshadweep leh Puducherry te an tel bawk. SIR kalpuina tur hian nakkuma inthlan hmabak state Tamil Nadu, West Bengal, Kerala, leh Puducherry-an tel a, mahse, inthlan hmabak tho Assam-ah erawh neih a ni rih dawn lo. Assam-ah hian a hrana kalpui tum niin a hun puanzar leh tura tih a ni.

SIR kalpui dan tur hi chief election commissioner Gyanesh Kumar chuan puangin, in tina kala data lakkhawmna tur form tihfel a nih hnuah November 4 aṭanga December 4 thleng data lakkhawm a ni ang. Hemi atan hian October 28 aṭanga November 3 thleng booth-level officer-te training pek an ni ang. Sawisel ngai leh siam ṭhat ngai awmte chu December 9 aṭangin nakkum January 8 thleng thehluh theih a ni dawn a, Roll ennawnna list tihfel hi February 7-ah tihchhuah tura ruahman a ni.

Assembly inthlan hmabak state pahnih - Kerala leh West Bengal-ah chuan SIR hi dodalna a awm. Kerala hian inthlan a hnaih tawh avangin kalpui rih loh an ngen a, West Bengal-ah erawh rorel lai Trinamool Congress hian thil fel lo a awm theih avangin an dodal ve thung, heti chung hian state pahnihah hian kaltlangpui a ni dawn tho. Bihar-a SIR kalpui a nih khan list aṭangin voter nuai 68 chuang paih a ni, hei hian eptu party aṭanga sawisel leh sawi zui pawh a hlawh phah hle.