HAL leh Russia UAC-te SJ-100 siam turin inrem

Hindustan Aeronautics Limited (HAL) leh Russia United Aircraft Corporation (UAC)-te chu civil commuter aircraft SJ-100 siam chhuahna turin inremna, memorandum of understanding (MoU) an ziak. Hei hi an thawh dunna hnuaia India-a passenger phur thlawhtheihna siam chhuahna hmasa ber tur a ni. Kum1961 khan HAL chuan AVRO HS-748 lo siam tawhin kum 1988 khan a titawp leh a ni.

Thawh dunna tur MoU hi Moscow, Russia-ah October 21 khan HAL aṭangin Prabhat Ranjan leh UAC aṭangin Oleg Bogomolove te'n an ziak.

SJ-100 hi twin-engine, taksa te chi thlawhtheihna niin, tun dinhmunah thlawhtheihna 200 siam chhuah tawh a ni a, commercial airline 16 in an enkawl mek bawk. HAL chuan SJ-100 chu thil thar thlentu tur a nih thu sawiin, hemi hmang hian UDAN Scheme hnuaiah zinkawng tawi chi inkalpawhna a ti awlsam thei dawn a ni. Scheme hnuaiah hian HAL hi SJ-100 chu ram chhunga dawrtute tan siam chhuah theihna phalna pek a ni bawk.

Indian aviation lam hian jet 200 chuang ram chhunga in kalpawhna tur hian a mamawh dawn a; hei bakah hian Indian Ocean huam chhunga ram pawn lam khualzin tlawhtute hman tur thlawhtheihna 350 bawr a mamawh dawn niin HAL chuan a tarlang. UAC nena an thawh dunna hmang hian heng mamawhte an phuhru thei dawn a ni.