J&K-a Article 370 tihtawp hnuah Firfiaka chetna ṭum 88 thleng tawh

Sorkar laipuiin August 5-a Jammu and Kashmir special status pekna, Article 370 a tihtawp hnu­ah J&K-ah hian firfiak zawnga chetna ṭum 88 a thleng tawh niin nimin khan home ministry chuan Parliament-ah a sawi. August 5-November 27 thlenga firfiak zawnga chetna thleng hi a hma, April 12-August 4 chhunga thleng aiin  17% dawnin a tlahniam tih home ministry chuan a sawi bawk. 

Home ministry hian pawikhawihna thleng zat hi sawi mah se, heng pawikhawhna thlenga thi leh hliam zat erawh a tarlang tel lo. He data hi minister of state for home G Kishan Reddy chuan MP palite zawhna a chhannaah a tarlang a ni. Article 370 tihtawp a nih hnua J&K-a khuah­khirhna hrang hrang hmante chu a tam zawk thlahdul ni tawh mah se, internet leh prepaid mobile service erawh tihtawp chhunzawm reng a la ni a, political leader eng emaw zat chu pawn chhuak thei loa hren an la ni bawk. 

Home ministry data-in a tarlan danin, August 5 hnu lama ramri kana India rama rawn luh ruk tum 84 zet an awm laiin, April 12-August 4 inkarah chuan 53 an ni thung tih a sawi. Sorkar laipui chuan Ka­shmir Valley-ah fir­fiakte lakah khauh zawka hma lain, kumin chhungin beihpui an thlaknaah firfiak 157 an thi tawh tih a tarlang bawk a ni.