BJP MP thusawi sawifiah turin Finance Minister phut

Bharatiya Janata Party (BJP) hruaitu Anant Kumar Hegde-a'n thlawptu ngah tawk lo chunga Maharashtra Chief Minister atana Devendra Fadnavis lakluh a nih chhan chu central fund, cheng vaibelchhe 40,000 hum a nih theih nan tia sawi chungchang chu Shiv Sena chuan sawifiah turin union finance minister Nirmala Sitharaman an phut. 

Karnataka MP Hegde hian November 23 zinga engmah puangzar lawk loa CM atana Fadnavis lakluh a nih chhan chu a hma aṭanga ruahmanna lawk, central fund humna tur a ni tih sawiin, he sum hi NCP, Congress leh Shiv Sena ten thuneihna an chan chuan an tichingpen mai dawn a ni, a ti. Fadnavis-a'n thuneihna a chan chhung reilote hian heng sumte hi humin, sorkar laipuiah pek kir leh vek a ni, a ti. Mahse a thusawi hi BJP leh Fadnavis ngei pawhin thu dik lo a ni tih an sawi thung. 

Shiv Sena chuan Maharastra state hma­sawnna hna thawhna tur sum, sorkar laipuia pek kir leh nia sawi chungchang hi sawifiah turin Finance Minister hi an phut tih nimina Lok Sabha-a Zero Hour neih laiin Shiv Sena MP Vinayak Raut chuan a sawi. Hemi chungchang hi BJP MP leh minister hlui Hegde ngeiin media hnenah ṭum thum zet a sawilang a ni, a ti.