China lawngin India tuipui chin phalna la loin a lut : Navy chief
Navy chief Admiral Karambir Singh chuan Chinese research vessel chu tunhnai khan India tuipui chinah phalna la loin a lo lut tih nimin khan sawiin, an hnawt kir leh tih a sawi.
An hmuhna hmun hi Andaman and Nicobar Island bul lawkah a nih thu leh phalna a neih loh vanga kir tir leh an nih thu a sawi bawk. "Kan dinna chu hei hi a ni, kan exclusive economic zone (EEZ) chinah engpawh in ti dawn a nih chuan, min hrilh hmasain phalna in la tur a ni," tiin nimin khan press conference-ah a sawi.
Vawiin hian Navy Day an hmang dawn a ni. United Nations Convention on the Law of the Sea ang chuan eng ram pawhin an ram tuipui kam aṭanga 200 nautical miles thleng EEZ an nei a, hemi chinah hian thuneihna neiin an duh angin hma an la thei a ni.
Admiral Karambir Singh chuan India tuipui china China lawng awmte chu an chhuizui reng tih sawiin,"Deep sea mining atan area pek an ni. Chinese oceanographic research vessel-te chu India tuipuiah an awm a, hun pek chhung chuan China lawng pasarih pariat vel chu an awm reng a ni," a ti.
India hian nakkum hian a ram chhak lam tuipui kamah multi-nation Milan exercise a huaihawt dawn a, ram 41 sawn tawhin, a ram sawm zingah hian China a tel lo thung. Singh chuan an rilru milpui ramte chauh an sawm tih sawiin, China navy-te nen chuan passage exercise takngial pawh an la ti ho lo tih a sawi bawk.