NDA-in Bihar Manifesto tlangzarh; Sorkar hnaah mi vaibelchhe 1 lak tiam

BJP kaihhruai Natioanal Democratic Alliance (NDA) chuan nimin khan Bihar assembly inthlan neih tur atana manifesto an tlangzarh a, thuneihna an chan chuan sorkar hnaah mi vaibelchhe khat lak belh an tiam.

NDA manifesto-ah hian hmeichhia thuam chakna tur scheme siam pawh tiamin, infrastructure lian tham tak din te, international airport pali leh expressway parasih siamte an tiam tel bawk. Hei bakah pucca house nuai 50 sak a, ration a thlawna sem te, electric unit 125 chin a thlawna pek te, damlo enkawlna Rs nuai 5 chin a thlawna pek leh, PM Awas Yojana hnuaia social security pension siam a nih tur thute an tarlang bawk a ni.

BJP national president JP Nadda leh Janata Dal United (JDU) hruaitu, Bihar chief minister Nitish Kumar-ten NDA manifesto, 'Sankalp Patra' hi an tlangzarh a, tlangzarh inkhawmah hian an thawhpui party hruaitu hrang hrangte an tel. NDA-ah hian BJP, JDU, Chirag Paswan-a kaihhruai LJP leh party tenau dangte an tel.

NDA chuan Bihar-ah thlan tlin an nih leh chuan ṭhalai zawng zawngte tan an thiam thil hmanga hna thawhna tur siamsak a tiam a, 'District tinah skill centre lian din vekin, Bihar chu khawvel huapa skilling centre-ah kan siam ang," an ti. Hei bakah infiamna tihhmasawnna tur pawh 'centres of execellence' eng emaw zat din an tiam bawk.

Chief Minister Women's Employment Scheme hnuaiah hmeichhiate chu sum lama ṭanpuina, Rs nuai 2 thleng pek an ni dawn tih an sawi a, hmeichhiaten kum khata Rs nuai khat tal an lak luh theihna tura thuam chakin, 'Lakhpati Didi' vaibelchhe khat tal siam an tum tih an tarlang. Hmeichhia, mahni kutkawiha eizawngte chu 'Mission Crorepati' kaltlangin crorepati-ah siam an tum tih an sawi.

Loneitute hamṭhatna turin, thlai an chin ṭhin zawng zawngah MSP (minimum support price) siam vek a, Karpuri Thakur Kisan Samman Nidhi scheme hnuaiah ṭanpuina Rs 3,000 ṭheuh pek an tiam bawk. Loneitute chhawmdawlna tura kum khata Rs 6,000 pek ṭhin chu Rs 9,000 ah tihpun a, sanghamantute puihna pawh Rs 4,500 aṭanga Rs 9,000 a tihsan an tiam. Sorkar chuan agri-infrastructure-ah Rs vbc nuai 1 a dah dawn bawk a ni, an ti.

NDA chuan Education City siam an tum tih sawiin, khawvel huapa university ṭha tae tan campus an hawng dawn tih an sawi. Chhungkaw rethei aṭanga zirlaite chu KG aṭanga PC thlengin a thlawna zirna pek an ni ang a, school-a midday meal pek ṭhin bakah zing lamah ei tur, breakfast pek a tiam bawk a ni.