TN-a party 44-ten SIR duh lohna SC-ah thlen dawn

Tamil Nadu chief minister, DMK hruaitu MK Stalin kaihhruaiin Pathianni khan political party 44 aiawhten meeting an nei a, Election Commission of India (ECI) in ram pum huapa electoral roll ennawnna, Special Intensive Revision (SIR) a kalpui tur chu duh loin Supreme Court-ah thlen an rel.

Meeting-a tel party 44-te hian SIR chu democracy kalphung lo nia sawiin, 2026 assembly inthlan neih tura voter tibuai thei tur nia an ngaih thu an sawi. Meeting-ah hian AIADMK leh BJP sawm an ni ve lo a, NDA aṭanga chhuak TVK, PMK leh AAMK te chu sawm ni mah se an tel lo thung.

Party hrang hrang aiawhte chuan resolution siamin, ECI chu revision a kalpui mek tihtawp turin an phut. SIR pawh Bihar-a kalpui a nih chungchang Supreme Court-in a ngaihtuah mek leh, thutlukna engmah a la siam hmaa ram pum huapa kalpui tumah an puh bawk. "SIR hi pawm theih a ni lo. A ṭhat tawk lohnate siam ṭhat phawt hnuah kalpui a ni chauh tur a ni, " tiin resolution-ah an tarlang. ECI chu centre-a BJP kaihhruai sorkarin a duh dan ang anga a thunun niin an sawi bawk.

Tamil Nadu hi nakkuma assembly inthlan nei tur a ni a, inthlan hnaihvai tawh taka SIR kalpui tum chu BJP sorkarin anmahni thlawp lo voter dik takte paih a tumna hmanrua a ni tiin CM Stalin chuan a sawi. "Bihar-ah kan hmu tawh a, ECI hian state dangah pawh tih leh a tum a ni," a ti. He hmalakna an duh lo tih hi Tamil Nadu chuan lantir zel a tum tih a tarlang.