MHA-in an thil phut kimchang theh lut turin Ladakh-a pawl 2 hriattir

Ministry of Home Affairs (MHA) chuan Ladakh Union Territory-a pawl pahnih, Leh Apex Body (LAB) leh Kargil Democratic Alliance (KDA) te chu inbiakna an neih hmain an thil phut chungchang chipchiar taka theh lut turin a hriattir. LAB leh KDA chuan Ladakh chu state-a hlankai an phut a ni.

KDA hruaitu, Sajjad Kargili chuan an thil phut hrang hrang tarlanna chu an buatsaih dawn tih sawiin, "Stakeholder-te pawh kan be vek dawn a ni. Kan thil phut pui ber chu state-a hlankai leh 6th Schedule a ni a, hei hi tualchhung mite ram leh hna chungchanga chanvo an neihte venhim sakna tur a ni," a ti. Eng ang rorelna nge an duh tih leh, Assembly leh Governor te thuneihna pek dan tura an duhdante pawh an sawi ho dawn tih a tarlang.

Kargili chuan LAB hruaitute pawh an thil phut chu theh luh turin an buatsaih ve dawn bawk tih a sawi a, "Kan peih fel hunah kan thil phutte chu kan inhrilh tawn leh ang a, hemi hnu hian joint copy kan siam dawn a ni," a ti. MHA hian hun bithliah sak loh thu a sawi a, mahse, tun kar chhunga peihfel hman an tum tih a sawi. Draft an theh luh hunah MHA chuan High Powered Committee (HPC) meeting nei tura a sawm an rin thu a sawi bawk a ni.

Ladakh-ah hian September thla khan state-a hlankai phut nawrh huaihawt leh police-te innawr buainaah police silai hmehpuahah mi pali an thi a, mi dang 80 vel an hliam bawk. MHA chuan he thil thleng hi a chhui chian tir thu a sawi.