Covid vanga doctor thi chhungte zangnadawmna dawng an tlem

Right to Information (RTI) hmanga zawhna chhannaah, Covid -19 hripui thawh khatna leh thawh hnihna len laia hri vanga doctor thi zingah, doctor 500 chhungte hnenah chauh zangnadawmna pek an la ni.

Sorkar laipui chuan hripui len laia hri vanga doctor thi zat hi data mumal a nei lo niin a sawi a, mahse, Medical Association (IMA) chuan doctor thi zat hi 1,600 dawn an tling niin a sawi thung.

Doctor thi chhungte hnena zangnadawmna pek an nih leh nih loh chungchanga RTI zawhna hi Dr KV Babu theh luh a ni a, kum 2022 aṭang khan a buaipui tawh a ni. Hripui len ṭan tirh, kum 2020 March 30-a sorkarin insurance scheme, Pradhan Mantri Garib Kalyan Package (PMGKP) a siamah healthcare lama thawktu, sorkar leh private health worker-te pawh an duty-na aṭanga Covid -19 hri kai a, an thihpui a nih chuan insurance cover Rs nuai 50 siamsak a ni.

Dr Babu chuan September 22-a RTI a thehluhah, he scheme hnuaia healthcare worker, Covid-19 vanga thi chhungte zangnadawmna pek tawh zat hi a zawt a ni. Zangnadawmna sem chhuaktu, New India Assurance Company Ltd., chuan he scheme hnuaiah hian mi 2,294 tan zangnadawmna an pe tawh tih sawiin, kum 2024 June 11 thlenga sum pek chhuah tawh chu Rs vbc 1,147 a nih thu a tarlang. Mahse, origninal file-te chu hemi kum June 12 khan a buaipuitu ministry hnenah an theh lut vek tawh avangin, data hi an nei tawh lo niin an sawi.