India leh Bahrain-in thawh dunna tihchak dan tur sawi

India tlawha rawn zin, Bahrain foreign minister, Abdullatif bin Rashid Alzayani leh external affairs minister S. Jaishankar te chu Thawhṭanni khan inbiaiin, ram pahnihte thawh dunna tihchak dan tur an sawi.

Bahrain minister hi Thawhṭanni khan ni thum cham turin India a rawn thleng a, a cham chhung hian ram hruaitute chu defence, leh sumdawnna huanga thawh dunna tihchakna tur chungchang a sawipui dawn a ni. Nimin khan Jaishankar nen 5th India-Bahrain High Joint Commission meeting an kaihruai dun bawk.

Meeting neih hma hian EAM Jaishankar chuan social media post-ah meeting neih turah hian thawh dunna tur atana hlawk thlak tak chungchang sawi tum a nih thu a tarlang a, an intlawh tawnna chuan India-Bahrain thawh dunna a ṭha zawnga a nghawng theih tur thu ministry chuan a sawi.

Hruaitu pahnihte hian US president Donald Trump-a'n 'Gaza Peace Plan' a siam chuan thil ṭha zawk a nghawng chhuah ngei an rin thu an sawi bakah, West Asia leh khawvel huap pawha thil thar nasa tak a thlen theih an beisei thute an sawi. High Joint Commission meeting an kaihhruai hnu hian thuchhuah inṭawm tichhuakin, ram pahnih chuan hmalam hun atana defence leh security huanga thawh dunna siam an duh tih an tarlang.

India hi Bahrain nena insumdawn tawn ram zingah top 5-ah a lang pha a, hei hian ram pahnihte'n Comprehensive Economic Partnership Agreement (CEPA) hmang tura inbiakna neih chungchang pawh nghawng ṭha tak a neih beisei a nih thu an tarlang. Ram pahnihte hian Double Taxation Avoidance Agreement (DTAA) siam an remti bawk.