PM-in ṭhalaite social media reels buaipui turin a duh zawk: Rahul Gandhi

Congress party hruaitu , Rahul Gandhi chuan nimin khan Bihar inthlan awm tura Aurangabad-a rally buatsaihah prime minister Narendra Modi chuan ṭhalaite chu social media reels vel buaipui turin a duh zawk thu a sawi.

Rahul Gandhi chuan PM Modi chuan a kaihhruai sorkara rorelna fel lo awmte aṭanga an rilru lak penna turin, ṭhalaite chu reels vel buaipui tur hian a duh zawk vang a ni, a ti. "Modi chuan Instagram, Facebook tih vela reels siam ngawl vei tur hian a duh che u a, hei hi kum zabi 21 bawra thil thleng langsar tak a ni bawk. Hetiang thil a duh chhan chu sorkarin education, health, leh hna chungchang an rorelna fel lo tak lak aṭanga in rilru lak pena in ngaihsak loh hi a duh a ni" a ti. Sawi zawmin, home minister Amit Shah leh PM Modi-te chu Bihar-a SIR kalpuinaa 'vote theft' thlengah khan NDA an chak dawn lo tih an hriat avanga inhnamhnawih ve an nih thu a sawi bawk.

Hna exam-a question paper put ru ṭhin pawh Bihar-ah a hluar hle thu sawiin, hengte hi sum leh pai ngah mi hausa tak tak fa zirlaite hlawkna thlen thei tur a nih vanga thleng ṭhin a nih thu Gandhi chuan a sawi. Bihar-a NDA kaihhruai sorkar chu bei zui bawkin, chief minister Nitish Kumar chuan ṭhalaite chu chhiahhlawh ang chauhin a chhuah a ni, a ti bawk. INDIA bloc-in thuneihna an chang a nih erawh chuan sorkar chu mi hnuaihnung, harsa zawk leh Dalits-te sorkar a ni dawn niin a sawi.