Bihar inthlan thawh khatna neih a ni

Ram chhung inthlan awm tur zinga thawm nei lian ber pawl, Bihar assembly inthlan thawh khatna chu nimin khan neih a ni.

Bihar-ah hian constituency 243 awmin inthlan thawh khatna hi constituency 121-ah neih a ni a, zing dar sarih aṭangin polling station 45,341-ah vote thlak a ni. Inthlan thawh hnihna hi November 11-ah neih a ni leh ang a, November 14-ah vote tla chhiarin result puan a ni ang.

Inthlan thawh khatna neihna, bial 121-ah hian candidate 1,314 chuang an awm. Candidate zingah eptu pawl, INDIA bloc chief minister candidate , Rashtiya Janata Dal (RJD) hruaitu Tejashwi Yadav bakah rorellai, National Democratic Alliance (NDA) a deputy chief minister pahnih, JD (U) member Samrat Choudhary leh Vijay Kumar Sinha bakah BJP minister eng emaw zat an tel.

Vote thlakna, polling station hrang hrangah a vawi khatna turin CCTV dah vek a ni. Chief election commissioner Gyanesh Kumar leh election commissioner S.S. Sandhu pawh EC control room, Nirvachan Sadan-ah an duty bawk.

Nimina inthlan neihna, constituency 121 hi district 18 huam chhunga mi niin, voter vbc 3.75 an awm. Tun ṭum inthlanah hian NDA leh INDIA bloc chu inbei ber tur niin, ṭangrual pawl pahnih thawhpui lo party tenau eng emaw zat an awm bawk a ni. Candidate 1,000 chuang zingah 32% chu criminal case nei lai an ni a,an zinga 27% chu thubuai rip tak - tualthah, tualthah tum leh hmeichhe laka pawikhawihna thlena puhna thubuai nei an ni. Candidate pahnih chu hmeichhe pawngsuala puhna thubuai nei lai an ni bawk. Constituency 91-ah candidate, criminal case nei pathum aia tam awmna an awm bawk a ni. Candidate 40%, mi 519 chu hausa tawntawn, cropepati an ni a, an zingah hian RJD aṭangin tam berin candidate 70 zinga 68, 97% chu crorepati an ni. BJP candidate zingah 92%, JD(U)-ah 91%, Congress 78%, LJP 77% leh Jan Suraaj candidate zinga 71% chu crorepati an ni.