1993-a Mumbai-a bomb tipuaktu in leh ram lilam dawn

Kum 1993-a Mumbai-a ṭum eng emaw zat bomb tipuaktua puh, Tiger Memon leh a chhungte in leh lo chu lilam a ni dawn tih official-ten an sawi. An lilam tur zingah hian pawikhawihna thlen dan tur rela meeting an neihna hmun, flat pakhat pawh a tel a ni.

Smugglers and Foreign Exchange Manipulators (Forfeiture and Property) Act Authority (SAFEMA) chuan special TADA court aṭangin Tiger Memon leh a chhungte thil neih, hmun 17 ami chanchin kimchang chu an dawng tawh a ni. Heng zinga hmun pariat chu SAFEMA hian laksakin, an chhungkua lo chen tawhna central Mumbai-a Al Husseini buliding-a flat pathum pawh a tel tih an sawi.

Tiger Memon hi kum 1993, March 12-a Mumbai khawpui hmun 12-a bomb tihpuah a nih hnuah a bibo nghal a, Pakistan-ah a awm nia hriat a ni. Bomb puakahhian mi 257 an thi a ni. A unaupa, Yakub Memon chu kum 2015 khan pawikhawihnaa a inhnamhnawih vangin khaihlum a lo ni tawh a, a chhungte dang ṭhenkhat pawh special Terrorist and Disruptive Activities (Prevention) Act (TADA) court chuan hremna a lo pe tawh bawk.

Memon-a ram neih zingah hian Kole Kayan area-a ram square meter 10,000 a zau pawh a tel a, Rs vbc 400 man hu nia chhut a ni. He ram hi SAFEMA kutah a la awm lo a, hei bakah South Mumbai-a a hmun pakhat leh, Bandra-a flat pakhat, Kapadia Nagar-a flat pahnih te chu SAFEMA hian lak tumin a buaipui mek a ni.