Navy Day lawmna hun hmang

Nimin kha Indian Navy Day a ni a, Kochi-a Southern Naval Command-ah a lawmna hun pui ber an hmang.

Vice Admiral A K Chawla, Flag Officer leh Southern Naval Command Commander-in-Chief-te chuan Naval base-a war memorial-ah lawng sipai ram tana nunna hlante zahna an hlan. Kum 1971, December 4 khan India Navy-te hian Pakistan lawng pali, an indo lawng chhuanvawr  PNS Khaibar telin, an kap pil a, Pakistan lawng sipai tam tak an that bawk a ni. 

Hemi ni hriatreng nan hian December 4 hi kumtinin Indian Navy Day-ah puan zui a ni a, 1971 Indo-Pak war-a nunna chante zahna an hlan ṭhin. Eastern Naval Command, Visakha­patnam-ah pawh a lawmna hun hmangin Andhra Pradesh chief minister Y S Jagan Mohan Reddy chu khual zahawm a ni.  

Mumbai-ah pawh hemi ni pual hian Beating Retreat leh Tattoo ceremony, Gateway of India-ah neih a ni bawk. Prime minister Narendra Modi chuan Navy-ten ram humhimna tura an hnathawh chu hlu a tih thu sawiin, Navy-te chu zahna chibai a buk thu a sawi a ni.