Delhi-ah free Wi-Fi hotspot dah tum

Delhi chief minister Arvind Kejriwal chuan nimin khan press conference a neihnaah, December 16 aṭang Delhi huam chhungah free Wi-Fi hotspots dah tum a nih dawn thu a sawi.

December 16-ah hian a thawhkhatna atan free Wi-Fi hotspot 100 dah phawt a nih tur thu a sawi bawk. Kejriwal chuan Aam Aadmi Party-in kum 2015-a Assembly election-a point 70 awmna an manifesto ami a nih thu sawi langin, mipui hnena an tiam hi tihhlawhtlin a nih tur thu a sawi bawk.

Thla ruk chhungin hotspot 11,000 dah hman tum a ni a, heng zinga hotspot 4,000-te chu bus stand-ah dah tum a nih bakah, a dang hotspot 7,000-te chu bazarah leh colony hrang hrangahte dah tura ruahhman a ni. Delhi-ah hian constituency 70 awmin, constituency pakhatah zel hotspot 100 dah tum a ni. Hemi atana hmalakna turah hian  cheng vaibelchhe 98 dah a ni bawk. 

Free Wi-Fi hotspot hi a chak zawng tura ruahhman chu 100-150 Mbps a ni a, nikhatah mi pakhatin 1.5 GB zel an hmang thei dawn a, thla khatah erawh 15 GB thleng hman theih a ni thung ang. Delhi hmun hrang hranga CCTV dahte chu Wi-Fi nena inzawm tir tum a ni bawk.