Paliament Winter Session December 1-19 chhungin nei dawn

Paliament Thlasik ṭhutkhawm (Winter session) chu December 1-19 chhungin neih a ni dawn tih parliamentary affairs minister Kiren Rijiju chuan Inrinni liamta khan a puang. Session neih tur hi X kaltlanga tarlangin, session hlawk thlak leh awmze nei, democracy tichaka mipui hlawkna thlen thei ngei tur neih tum a nih thu a tarlang bawk.

Winter Session hi kum dangah chuan November kar thumnaah neih ṭanin Krismas hmaa zawh ṭhin a ni a, kumin ṭan hun tihkhawtlai a ni hi eptu pawl party lam chuan an sawisel zui nasa hle. Congress hruaitu Jairam Ramseh chuan sorkar chu awmze nei loa session neih hun tikhawtlai leh tibuaiah a puh a; sorkar chuan bill a pass leh dawn loh bakah debate neih pawh a remti leh dawn lo niin a tarlang.

Parliament monsoon session-ah khan Lok Sabha-ah bill 12 leh Rajya Sabha-ah 14 pass a ni a, session hian thla khat chhung a awh. Monsoon session-ah hian house pahnihah Operation Sindoor chungchanga eptu pawl lamin debate an ngiat vang leh, Bihar-a Special Intensive Revision(SIR) kalpui duh lohna lantir avangin ro rel tur pawh a khaihlak phah nasa hle.