India mi leh sa Myanmar scam centre-a thawk 197 hruai kir

Myanmar chhim lam, Thailand ramria cyber scam centre-a chhawr, India mi leh sa 197 chu Thawhṭanni khan Indian Air Force(IAF) chuan Mae Sot, Thailand aṭangin hruai haw. Hruai kirte hi Thailand prime minister Anutin Charnvirakul chuan a rawn vailiam tih India embassy chuan tarlang.

October thla Myanmar sipaiten scam centre dap beihpui an thlak ṭuma centre-a thawk India mite hi Thailand ramah an tlanchhia a ni. Thailand-ah hian dan loa an rama lut an nih avangin hren an ni. Thailand-a India embassy leh Chiang Mai-a consulate-te chuan hma lo lain, India ramah thawn haw an ni thei a ni. Scam centre aṭanga Thailand-a tlanchhia, India mi hi 450 chuang nia sawi a ni. Kar liam ta Ningani khan an zinga mi 270 chu Mae Sot aṭang hian IAF speical flight pahnih hmangin thawn haw an lo ni tawh a, an zingah hian hmeichhia 26 an tel.

Thailand-a India ambassador, Nagesh Singh chuan Thailand PM Charnvirakul nen an inbiak thu sawiin, pawikhawihna do let tura an thawh dunnaah nghet taka an din dun thu sawiin, ram pahniha agency-te pawhin a ṭul ang zela thawk dun tura hma lak zel an tum tih an sawi bawk.