44th India International Trade Fair ṭan a ni

India International Trade Fair (IITF), kum tina neih ṭhin chu nimin khan a vawi 44-na turin Bharat Mandapam, Delhi-ah neih leh ṭan a ni. India Trade Promotion Organisation(ITPO) buatsaih niin; thupui atan "Ek Bharat, Shreshtha Bharat" tih hman a ni. State leh union territory hrang hrangte hnam ziarang leh nunphung tarlan chu a tum ber a ni.

Trade fair-ah hian kutkawih eizawnna, kut themthiamna, thil thar chin chhuah bakah technology-a India hmasawnna tilang thei tur cybersecurity, AI innovations, deep-tech, leh operating system-te pholan a ni. India thil siam chhuah hrang hrang pholan niin, ram chhung bakah ram pawn aṭangin chhimtu ṭhahnem tak an pung khawm. In pumkhatna ṭha leh thawh hona ṭha neih mipuite thinlunga tuh chu he fair-in a thil tum pakhat zingah a tel.

Kumin hian Uttar Pradesh, Bihar, Rajasthan, leh Maharashtra bakah Jharkhand-te chu a thawhpui state atan thlan an ni. Heng bakah hian ram pawn aṭangin exhibitor ram 12 an awn a, an zingah hian United Arab Emirates (UAE), Sweden, Republic of Tunisia, Türkiye, Republic of Lebanon, Egypt, China, Iran, leh South Korea te an tel a ni.

Trade fair-ah hian mi 60,000 vel tel thei tura buatsaih a ni a, Thawhṭannia Delhi-a bomb puah hnu lawka neih a nih avangin venhimna pawh khauh taka kalpui a ni. Venhim hna thawk hian special unit pawh dah an ni a, mihring che vel pawh CCTV hmanga thlithlai reng niin Anti-sabotage teams, Quick Reaction Teams leh dog squad-te'n an vil reng a ni.